Home

Veer verwelkómme uuch op de nuije site vaan ” De Stöblappe “

 

Wee zien veer en wat höbbe veer veur?:

Veer zien e kliekske awwer rieper luij in d’n awwerdom vaan zoe umtrint 65 jaor die ziech vreuger in de Berchmans höbbe liere kinne en boevaan de mieste hun vrôw of hunne maan dao ouch höbbe opgesjaard. Iech maag wel zègge tot veer dao toen zoene sjieken tied höbbe mèt gemaak tot us dat altied beij is gebleve. Toen daan ouch in 1988 ziech ’n momint veur deeg boe door veer us weer ‘ns gèt dèkser zowwe kinne zien, waor us kliekske gebore.

Mèh daor euver kint geer mieijer leze in ’t chapiter “Historie”.

Wat doen veer, jèh eigelik is dat gaaroet neet zo väöl, twie kier in ’t jaor koume veer same um gezèllig te klasjenere, ziech eine te drinke en ‘n denske te make.

D’n ierste kier is in’t veurjaor zoe roond 5 mei, daan hawwe veer us “Veurjaortreffe” dat besteit oet ’n evinnemint, zoe ès ’n tournee door de stad, door d’n umtrèk heijvaan of ‘n beziechteging vaan ein vaan de mónnuminte in de naoventrint vaan us sjoen mooijerstad. Heij nao höbbe veer altied ‘ne BBQ in us thoes hoonk café “De Bookvink” aon de Papeweeg boe veer te gas zien beij hospes Harald Hardy en zie vruike Diana.

’T twiede vèlt zoe roond 30 oktober veer numme dat us “Naojaorsfies”, dit is gewoen ‘ne gezèllige aovend boe e hèpke gegete weurt en netuurlik ouch gèt weurt gedroonke, um de kas gèt te spèkke hawwe veer ’n loterrijj, heij zien zoewèl de prijze vaan de leutsjes es de te winne prijze hiel goojekoup.

Iech höb heij bove met opzat neet euver ’n vereineging gesproke mèh euver e kliekske umtot veer in us kliekske wel e bestuur höbbe mèh gein regelkes. Veer doen ’t wel zoonder!!

Wèlt geer ouch beij us kliekske koume daan kint geer uuch heij veur opgeve door e meelke te sjikke naor uzze habsjaar Bert van de Kragt.